Sajak-Sajak Risnawati
Sing Sabar
Sing sabar, ceuk manéhna ka Mang Udin
nu geus sabulan murang-maring
“Sabar-sabar kuma peta!” ceuk Mang Udin rungsing
pabéasan aing garing
beurang peuting gawé ngan cicing
boa isuk aing jadi parab cacing
Sing sabar, ceuk manéhna ka Kang Dudu
nu geus sabulan roman bangkenu
“Sabar-sabar kuma peta!” ceuk Kang Dudu murukusunu
pabéasan aing muluntu
dikedukan unggal waktu
budak ngarenghik teu kabeuli buku
boa isuk aing teu nyatu
Sing sabar, ceuk manéhna ka Ma Inah
nu geus sabulan teu weléh luh-lah
“Sabar-sabar kuma peta!” ceuk Ma Inah amarah
pabéasan aing kari sérah
lantaran korona teu geura nyingkah
Sing sabar, sora dina televisi hawar-hawar
Pamaréntah lain teu ihtiar
jungkel-jumpalik sangkan rahayat dalahar
Sing sabar!
ceuk manéhna bari pakepuk nyusun jadwal wébinar
Tujuh Puluh Lima Taun
Umbul-umbul tinghariul saparat lembur
beureum, konéng, héjo, paul
ngabaretem nataran wanci
nu tingjorélat dina unggal tihang awi
Bapa, iraha balap kaléci?
kuring rék miluan deui
ayeuna mah kuring jangji
rék jadi juara hiji
Ema, iraha rék balap karung?
kuring ayeuna geus siap tarung
di lapang hayang padungdung
ngadu leceng ngadu untung
Umbul-umbul nu rajeg anggur luk tungkul
ngeueung keueung na batin-batin cakueum
Keur Anjeun
Ieu sajak ditulis ku mangsi asih
keur anjeun nu teu jejerih guyang kapeurih
bégalan pati di palagan wanci
Ieu sajak minangka tilam katresna
keur anjeun nu teu owel tanaga
cul anak jeung kulawarga
ihlas raga sosoroh nyawa
Ieu sajak dikotrét bahé jeung haté
keur anjeun nu tara ngangluh ku capé
béak beurang béak peuting béak poé
raga celong haropak nandangan lungsé
Ieu sajak, ngagurit nu tandang jurit
anjeun pahlawan nu suhud di rumah sakit
New Normal
Lahan-lahan dibukbak, sakuliah dunya kuriak
ieu jaman new normal, ceuk manéhna
laju mayit-mayit digarotong na pasaran
dipirig jerit silung ngalanglaung
sukma-sukma haropak lunta tina kurung
Lahan-lahan dikali, sakuliah dunya ngageuri
ieu jaman new normal, ceuk manéhna
laju dokter-dokter digarotong dina peti
dipirig hariring pati nyasaak ati
raga-raga leuseuh ngalungsar éléh wowotan
Jalma-jalma balawiri, sakuliah dunya suka-seuri
ieu jaman new normal, ceuk manéhna
laju pasar, mol, bioskop, sakola, didarémo sina buka
teu nolih ka nu geus béak tarékah
capé haté nungguan sasalad ingkah
Cukong-cukong sareuri, kahirupan laju deui
ieu jaman new normal, ceuk manéhna
laju ngantri saléngkah demi saléngkah
sabot nungguan nu hareup ingkah
lempeng muru tutunggul nu beuki rekah
