Sajak-Sajak Muhamad Faisal
Kaméja
aya keclak dina pésak calana salira:
lilana kasabaran nu disimpen
dina sesela lipetanana
aya juuh dina saku baju salira:
lawungna keuheul jeung handeueul
di satukangeunana
tapi salira masih nalikeun kaihlasan
kana kerah kaméja, ngancingkeun kaasih
nu mulangkeun kanyaah kana dada
2019
Lingkung Waktu
urang moal salilana
ngusapan bujur nu neueul
dina lingkung waktu salira
kapan sagala nu aya
bakal jadi euweuh
hawa nu diseueup
dina juru waktu
laun-laun jadi ibun
keclak nu dipeureut
tina hulu napsu
laun-laun jadi utun
kapan nu euweuh
bakal jadi aya
2019
Telepon
majar sono ngarénghap
tina telepon salira
laju ngaranjug
kana telepon kuring
ngan urang moal bisa
ngalogoran kasono
liwat sora telepon
kawas ngudar
tali-tali kakangen
dina luhur enggon
2019
Telepon 2
mun sono tina panon
laju turun kana telepon
ulah kingkin anaking
urang patepang layar
da cinta jeung kanyaah
masih bisa dibandingkeun
kana naon waé
kana telepon
anu teu salilana ditongton
sakapeung sok cul digolérkeun
2020
Telepon 3
mun bapa teu balik
ulah waka ceurik anaking
moal nanaon, aya telepon
dongéng teu salilana
kaluar tina sora manusa
sakapeung tina létah pulsa
sarua kawas cimata
anu ngeclak liwat kuota
asalna ti sungapan cinta
sigana geus titis-tulisna
Bapa nu pangheulana aya
suka kana hal anu maya
2020
